Sinn Féin ag géilleadh ar a gcuid prionsabal ar mhaithe le cumhacht - Toiréasa Ferris

Dúirt Toiréasa Ferris in agallamh le RTÉ Raidió na Gaeltachta go raibh Sinn Féin ag géilleadh an iomarca ar a gcuid prionsabal ar mhaithe le cumhacht, agus go raibh sí an-sásta go raibh an pholaitíocht fágtha ina diaidh aici.  

Bhí Ferris ina comhairleoir contae i gCiarraí idir 2003 agus 2019.

San agallamh ar An Saol ó Dheas, labhair sí faoina cinneadh éirí as an bpolaitíocht, agus dúirt sí: “Thuigeas go raibh Sinn Féin ag dul i méid.  It didn’t sit well liom. Bhí comhráití ag tosú ag an sin faoi, mar shampla, an Special Criminal Court, agus fiú na blianta roimhe sin an cháin chorporáideach… de réir mar a bhí an chosúlacht ann go mbeadh deis againn a bheith i gcumhacht, bhí rudaí a bhí ina red line na blianta go dtí sin, nach raibh a thuilleadh. Níor shuigh sé sin go maith liom.”   

Dúirt sí go raibh sí an-sásta faoina cinneadh éirí as an bpolaitíocht, agus go ndearna sí díreach ag an am ceart é.  

Fadhb an chócain i nGaillimh a phlé sa chlár Snaoisín Bán ar RnaG

Tháinig méadú níos mó ná 50% ar an líon daoine a rugadh orthu i gConamara sa bhliain 2022 le cócaon ina seilbh acu i gcomparáid leis an mbliain roimhe sin

“An rud is fearr ná gur rinne mé an cinneadh sin, mar más cuimhin leat an chéad vóta a bhí sa Dáil tar éis an toghchán i 2020 bhí sé ar an legislation faoin Special Criminal Court agus do staon Sinn Féin. Ní bheinnse tar éis staonadh, só an chéad rud a bheadh tarlaithe bheinn caite amach as an bpáirtí parlaiminte mar nár chloí mé leis an treoir mar ní bheinn tar éis é sin a dhéanamh.”  

Dúirt sí san agallamh le Helen Ní Shé gur éirigh sí as an bpáirtí go hiomlán tar éis di éirigh as an gComhairle Contae 

“Ní raibh uaim a bheith páirteach le cad a bheadh ar siúl. Tá súil agam go bhfuil mé mícheart. Poblachtánach is ea mé.  Tá ana chuid poblachtánach i Sinn Féin. Tá ana chuid daoine i Sinn Féin, ní dóigh liom gur poblachtánaigh iad, b’fhéidir náisiúnaigh, b’fhéidir sóisialaigh, ach níl siad an dá rud. Ní raibh uaim a bheith páirteach leis an méid go bhfuil eagla orm go bhfuil siad sásta a ghéilleadh ar mhaith le cumhacht. Braithim mídhílis á rá sin, go háirithe nuair atá mé fós ana chairdiúil le ana chuid de na daoine sin, agus sin just an amhras a bhí orm i gcónaí, cé chomh fada is a bheidh siad sásta dul ar mhaithe le cumhacht.” 

Dúirt sí go ndúirt sí ariamh nach polaiteoir a bhí inti, ach gníomhaí, agus dúirt sí nach raibh sí chun vótáil don pháirtí a thuilleadh, ach don iarrthóir.  

“An slí atá mé chun vótáil as seo amach – níl mé chun vótáil i gcomhar an páirtí a thuilleadh, tá mé chun vótáil don ionadaí a sheasann do na rudaí atá tábhachtach domsa. I mo thuairimse, siad Sinn Féin an t-aon pháirtí i láthair na huaire gur féidir rudaí a dhéanamh níos fearr. Ach an mbainfidh siadsan amach an saghas tír atá ag teastáil uaim agus a cheapaim go bhfuilimid i dteideal a fháil faoi dheireadh?  Ní dóigh liom.” 

Bhí Toiréasa Ferris faoi agallamh ag Helen Ní Shé ar An Saol ó Dheas ar RTÉ Raidió na Gaeltachta.