Imscrúduithe curtha ar bun tar éis d’fhear bás a fháil i gcoimeád an Gharda Síochána
I ráiteas, dheimhnigh Fiosrú – Oifig Ombudsman na bPóilíní – gur thug a chuid imscrúdaitheoirí cuairt ar an láthair agus go bhfuil fiosrúchán neamhspleách ar bun
Tá fiosrúcháin ar bun tar éis bhás fir a bhí faoi choimeád na nGardaí ag Stáisiún Gardaí Chill Dara.
De réir na nGardaí, thángthas ar an bhfear – a bhí sna tríochaidí – agus é gan freagra, thart ar 9.35 r.n. Dé Sathairn.
Chuir na Gardaí cúnamh leighis ar fáil dó, ach dearbhaíodh ina dhiaidh sin go raibh sé tar éis bháis.
I ráiteas, dheimhnigh Fiosrú – Oifig Ombudsman na bPóilíní – gur thug a chuid imscrúdaitheoirí cuairt ar an láthair agus go bhfuil fiosrúchán neamhspleách ar bun.
Dúirt Fiosrú go mbaineann a chuid fiosrúchán le heachtraí ina raibh teagmháil leis na Gardaí i gceist, agus inar cailleadh ball den phobal nó inar gortaíodh go dona é.
"Ní hionann tagairt a dhéanamh agus a rá go bhfuil líomhain mí-iompair curtha i leith Garda nó Gardaí," a dúirt an eagraíocht.
"Ina áit sin, ciallaíonn sé gur cheart do Fiosrú an eachtra a fhiosrú go neamhspleách, chun a fháil amach an bhféadfadh gníomh nó neamhghníomh de chuid Garda nó Gardaí a bheith ina chúis le bás duine, nó le díobháil thromchúiseach dó."
Cuireadh Oifig Phataolaí an Stáit ar an eolas faoi bhás an fhir.