Nochtadh an liosta aíonna do chlár speisialta Oíche Shamhna an Late Late Show!
Féach ar The Late Late Show ar RTÉ One agus ar RTÉ Player, ó 9.35in an Aoine seo
Tá séasúr na taibhsí buailte linn, agus tá clár iontach draíochtúil i ndán dúinn ar The Late Late Show an tseachtain seo don eagrán speisialta d’Oíche Shamhna!
Beidh fáilte ag Patrick Kielty roimh aisteoir Éireannach finscéalach, fuirseoir agus cruthaitheoir podchraoltaí den scoth, agus ceoltóirí a chuirfidh draíocht ar an lucht féachana.
Beidh leagan ceoil comhaimseartha d’amhrán clasaiceach Oíche Shamhna le cloisteáil – ceann a chuirfidh sceimhle agus spraoi ag an am céanna i gceist! Roinnfidh na haíonna scéalta faoi Oíche Shamhna, agus cuirfear ceann de na haíonna faoi thástáil speisialta ina mbeidh scanradh i gceist.
Ina theannta sin, tabharfar ómós do cheann de na haisteoirí is mó cáil in Éirinn, Fionnula Flanagan, le linn an chláir.
Mhair a gairm bheatha i Hollywood níos mó ná leathchéad bliain, tréimhse inar bhuaigh sí go leor gradaim, lena n-áirítear gradam Emmy. Fuair sí moladh mór ó léirmheastóirí as a róil shuntasacha i scannáin ar nós *The Guard*, *The Others*, *Transamerica* agus *Some Mother’s Son*. Ó bheith ag seinm ar stáitse Broadway go dtí róil a bheith aici i sraitheanna teilifíse a bhfuil cáil mhór orthu, ar nós *Lost*, *Star Trek* agus *Murder She Wrote*, ní raibh Fionnula riamh ina duine a d’fhan ina seasamh in aon áit amháin ar feadh i bhfad.
Tar éis di 60 bliain a chaitheamh i Hollywood, d’fhill sí ar an Éirinn a bhfuil grá mór aici di in 2024. Beidh an oíche lán de chuimhní ar ghairm bheatha iontach Fionnula, idir an stáitse agus an scáileán.
Beidh na haisteoirí Kate Mulgrew (*Star Trek: Voyager*, *Orange is the New Black*) agus Clinton Liberty (*Normal People*, *House of the Dragon*) i láthair in éineacht le Patrick chun labhairt faoin dráma nua de chuid RTÉ, *The Galway Bay Murders*.
Pléifidh siad an taithí a bhí acu ag scannánú ar chósta thiar na hÉireann, an t-áthas a bhí orthu a bheith ag obair le Colm Meaney, agus an chaoi a bhfuil Oíche Shamhna ina ham aisteach do dhaoine a bhfuil róil íocónacha léirithe acu!
Le beagnach tríocha bliain anuas, bhí an craoltóir Joe Duffy ina ghuth do mhuintir na hÉireann ina ról mar láithreoir ar an gclár *Liveline* ar RTÉ Radio 1. Labharfaidh sé le Patrick faoina leabhar is déanaí, ina ndéantar cur síos ar scéalta neamhghnácha ó *Liveline* – scéalta a léiríonn glúin a raibh a cuid ardaithe agus íslithe féin ag baint léi i saol na hÉireann. Pléifidh an fuirseoir agus an cruthaitheoir podchraoltaí, Shane Daniel Byrne, a thuras camchuairte leis an seó nua atá aige, *Baby This Time*; an ról atá aige mar Clarence i léiriú nua de *It's A Wonderful Life* ag Amharclann an Gheata (in ainneoin nár fhéach sé ar an scannán riamh!); agus an raibh sé ciallmhar post maith a raibh pinsean ag dul leis a fhágáil ina dhiaidh chun dul i mbun gairme sa fhuirseoireacht!
Beidh Joe McGucken, réalta an dráma grinn osnádúrtha *The Unreal* (ar RTÉ KIDS) agus láithreoir an phodchraolta rathúil *Ramble*, i measc na n-aíonna eile ar *The Late Late Show* an tseachtain seo.
Beidh ceol le cloisteáil ó Toshín, a bhfuil cáil uirthi as a guth cumhachtach agus an láithreacht spreagúil atá aici ar an stáitse.
Is féidir féachaint ar *The Late Late Show* ar RTÉ One agus ar RTÉ Player, ag tosú ar 9.35 i.n. an Aoine seo.