Réaltán Ní Leannáin agus Dubhán Ó Longáín i mbun ranga

Ar suim leat fáil amach faoi cheird an scríbhneora nó fiú triall a bhaint as giota scríbhneoireachta? Beidh dhá cheardlann ar fáil Dé Sathairn, Bealtaine 6 - Réaltán Ní Leannáin agus Dubhán Ó Longáin.  

Beidh Réaltán i mbun oibre ar maidin le ceardlann próis agus beidh Dubhán Ó Longáin chun ceardlann fhilíochta a dhéanamh um thráthnóna.
As Béal Feirste ó dhúchas do Réaltán Ní Leannáin. Tá ceithre leabhar dá cuid féin i gcló aici, agus is Eagarthóir Liteartha í den díolaim Bláth na dTulach, díolaim a bhuaigh Gradam Uí Shúilleabháin in Oireachtas na Gaeilge, 2022.

Bhí sí ina scríbhneoir cónaitheach in Ollscoil Chathair Bhaile Átha Cliath i 2019 agus scríbhneoir cónaitheach UNESCO Bhaile Átha Cliath don bhliain 2021-2022.
Dúirt Réaltán: “Ní hionann scríobh ó do thaithí féin agus scríobh beathaisnéis. Beidh muid ag amharc ar an dóigh a n-athraíonn scríbhneoirí ón saol réadúil go ficsean. Cuirfear roinnt samplaí scríbhneoireachta os comhair an ranga chun plota, léiriú carachtair, cúlra agus eile a léamh agus a phlé. Scríobhfar píosa mar ghrúpa – scéal páiste a athscríobh i seánra do dhaoine fásta, nó a mhalairt, de réir mar a oireann."
Beidh deis ag rannpháirtithe próiseas na scríbhneoireachta a fhiosrú fosta, an tábhacht le hathdhréachtú, tús a chur le píosa nua nó pilleadh ar phíosa a scríobhadh cheana, amlíne oibre a dhréachtú, straitéis oibre a phleanáil, tacaíocht a aimsiú. Cuirfear leabharliosta gairid ar cheird na scríbhneoireachta ar fáil fosta.

File, scríbhneoir, taighdeoir, agus teagascóir Gaeilge é Dubhán Ó Longáin. Conallach é atá ag teagasc in Ollscoil Luimnigh agus a bhfuil PhD idir lámha aige in Ollscoil Uladh. An Fhiannaíocht is ábhar dá thaighde dochtúireachta agus is maith leis seanscéalta a athmhúnlú agus cor nua-aoiseach a chur iontu ina chuid scríbhneoireachta cruthaithí. Tá duaiseanna bainte amach aige mar gheall ar a dhánta ‘traidisiúnta’ agus ‘slam’ araon agus a chéad chnuasach, IDEO Locator, foilsithe ag Coiscéim. Rinne sé filíocht a aithris ag ócáidí éagsúla, Electric Picnic ina measc.
Ceardlann é seo a bheidh fóirsteanach do thosaitheoirí agus daoine a bhfuil píosaí scríofa acu cheana. Amharcfar ar achan ghné de scríobh na filíochta sa cheardlann seo, ó spreagadh, nó cad a ba chóir a dhéanamh nuair nach bhfuil sin ann, go scríobh, go heagarthóireacht.

Beidh seans ag na rannpháirtithe dánta/líne a scríobh agus an tuiscint atá acu ar an rud is filíocht ann a phlé. Cumfar dánta/línte filíochta ar dhóigheanna éagsúla agus pléifear tionchar thimpeallacht an scríbhneora mar aon leis an tionchar a imríonn ceol agus léitheoireacht ar an fhile.

 
Is féidir ceardlann amháin, nó an dá cheann a dhéanamh cibé rud a oireann do dhaoine. Costas €10 don lá iomlán agus beidh ort do chuid lón a cheannach nó a thabhairt leat ach beidh tae, caifé agus sólaistí ar fáil i rith an lae. 
Tá clárúchán riachtanach agus is féidir teagmháil a dhéanamh le eolas@lionralc.ie chun d'áit a chur in áirithe nó má tá ceist ar bith agat.