Uachtarán Comhaltas na Mac Léinn sásta leis an malairt treo i gcás ardú cíosa i nGaillimh

Tá fáilte curtha ag Comhaltas na Mac Léinn in Ollscoil na Gaillimhe inniu roimh an scéala go bhfuil Hubble Living, an soláthraí lóistín do mhic léinn i nGaillimh, tar éis na harduithe a bhí beartaithe acu ar tháillí lóistín don bhliain acadúil 2024/25 a chur ar ceal.

Bhí €2,500 d’ardú bliantúil le bheith ann i gcás mic léinn atá ag stopadh i seomraí sómasacha en suite na cuideachta ar Bhóthar Áth Cinn, Gaillimh.

I dteachtaireacht ríomhphoist a fuair cónaitheoirí an tseachtain seo chuir Hubble Living in iúl nach mbeadh siad ag dul ar aghaidh le hoibreacha athchóirithe ar sheomraí san ionad de bharr “aiseolas” a fuarthas.

Bhí nasc sa teachtaireacht ríomhphoist chuig láithreán áirithinte seomra agus na rátaí nua le haghaidh seomra ansin.

Ní raibh aon fhaitíos ar Chomhaltas na Mac Léinn agus iad ag agóidíocht i gcoinne an ardaithe cíosa, achainíocha á scaipeadh acu, an cheist á plé sna meáin acu chomh maith le stocaireacht ar pholaiteoirí.

Dúirt Dean Kenny, Uachtarán Chomhaltas na Mac Léinn: “Tá áthas orm go bhfuil socrú stuama sroichte agus go bhfuil an brú ollmhór ón bpobal ar Hubble Living tar éis dul i bhfeidhm orthu sa chaoi is go bhfuil cinneadh déanta acu gan dul ar aghaidh leis an ardú scannalach ar phraghsanna mar a bhí beartaithe acu.

"Caithfear ceisteanna cuí a chur anois maidir leis an gcaoi a raibh siad in ann tús a chur leis an bpróiseas seo agus an chaoi nach gcuirfí bac rompu murach an torann go léir a rinne muidne ina leith taobh le hionadaithe áitiúla, Teachtaí Dála, Airí agus, gan amhras, iad siúd atá ina gcónaí in Hubble a bhí lárnach chun an malartú seasaimh seo a bhaint amach.

"Ní ghlacfaidh mic léinn le harduithe cíosa mar seo gan troid ina gcoinne, rud atá léirithe acu ina gcuid gníomhartha leis an ardú cíosa seo a chur ar mhalairt treo."