“Scoraíocht Dhiarmuda & Ghráinne, Ar Oileán an Ghnáth e léiriú in Amharclann Ghaoth Dobhair

Is cúis mhór áthais d'Amharclann Ghaoth Dobhair a fhógairt go mbeidh an gheamaireacht agus Scoraíocht Dhiarmuda & Ghráinne, Ar Oileán an Ghnáth á léiriú ag Aisteoirí Ghaoth Dobhair ón 28ú Feabhra go dtí Márta 2. 

Geamaireacht nua-scríofa atá sa gheamhaireacht agus scoraíocht seo ó péann an t-údar ildánach Eoghan Mac Giolla Bhríghde. 

Suite i ndomhan draíochtúil Oileán an Ghnáth, nochtann Scoraíocht Dhiarmuda agus Ghráinne scéal eachtraíochta lán le greann, draíocht, rómánsaíocht agus magadh. Tá an scéal dírithe ar an cleamhnas atá beartaithe idir an Prionsa Diarmuid agus an Banphrionsa Gráinne, pósadh a d'fhéadfadh síocháin agus rath a thabhairt dá ríochtaí.

Ach ar an drochuair, tá banríon an dorchadais, Mórígan, agus a comhpháirtí, an vaimpír fuilteach
Abhartach, ag pleanáil cur isteach ar an chleamhnas seo ar mhaithe leo féin. Le carachtair éagsúla, amhail Dagda an Draoi, Rí Lugh, an fuirseoir Manannán, Brigid, Nancy an bheansí, agus an carachtar mistéireach Bi-dad a mhac, téann an scéal trí fhoraoisí draíochtúla, caisleáin mhóra, agus saotharlanna mistéireacha.

Meascann an gheamaireacht, atá feilúnach do teaghlach uilig, eilimintí traidisiúnta scéalta béaloidis agus greann, a thabharfaidh an lucht féachana ar thuras spraíúil.
Is ó thobar chruthaitheach Eoghan Mac Giolla Bhríghde a thagann an gheamaireacht úr seo agus níl amhras ar bith ná go rachfaidh an saothar i gcion ar an lucht féachana ó thús deiridh.
“Táimid ar bís an scéal draíochtúil seo a thabhairt chun beatha in Amharclann Ghaoth Dobhair” a dúirt Mac Giolla Bhríghde. “Tá súil againn go mbeidh deora i súile an lucht féachana, idir óg agus aosta, ‘sé sin deora siocair iad a bheith ag gáirí” a dúirt sé.
Tá ticéid don dráma ar fáil anois.

Is féidir iad a cheannacht sa Chrannóg, i Siopa SPAR Molloy’s agus ar Ticket Tailor. Beidh aon ticéad a bheidh fágtha ar díol ag an doras ar an oíche.