Scoth an cheoil as Oirialla í sraith úr An Fonn Óg ag teacht chugaibh i Lúnasa

Cuireann séasúr an tsamhraidh fáilte roimh ghuth úr ar BBC Gaeilge – Bláithín Mhic Cana as Contae Ard Macha. Cuirfidh Bláithín, ceoltóir as Oirialla, sraith úr ceithre chuid i láthair, An Fonn Óg, ina ndíríonn sí ar an dóigh a bhfuil ceoltóirí óga ag caomhnú ealaín sin na hamhránaíochta ar an tsean-nós.

Thar na ceithre seachtaine, le tosú Céadaoin an 2 Lúnasa, cluineann muid ceathrar de na hamhránaithe óga traidisiúnta sean-nóis is fearr ina cuideachta, iad go léir ag caomhnú na healaíne ársa seo.

Labhraíonn siad ar na laochra atá acu i saol an tsean-nóis, ar a n-áirítear Lillis Ó Laoire, amhránaí a bhfuil Corn Uí Riada, príomhchomórtas na hamhránaíochta ar an tsean-nós ag Oireachtas na Gaeilge, tugtha leis faoi dhó aige.

Sa chéad chlár, tá fear de bhunadh Thír Chonaill atá anois ag cur faoi i mBéal Feirste, Naoise Mac Cathmhaoil. An tseachtain ina dhiaidh sin, Lúnasa 9, téann Bláithín sa tór ar thraidisiún amhránaíochta Chiarraí ón chraoltóir, agus curadh reatha na mban sa tsean-nós, Sláine Ní Chathalláin.  

Labhraíonn curadh na bhfear sa tsean-nós, Domhnall Ó Braonáin, ar thraidisiún Chonamara agus ar thionchar a mháthar ar a stíl cheoil féin – is í sin Caitlín Ní Chualáin, bean a bhain Corn Uí Riada roimhe.

Críochnaíonn an tsraith le Róise Nic Corraidh, amhránaí a tógadh i mBéal Feirste atá anois ina cónaí i nGaeltacht Thír Chonaill, ag caint ar thionchar Oileán Thoraí ar a cuid ceoil.

Tosneoidh an chlár an BBC ar Lúnasa 2.