Seoladh achomharc sábháilteachta dóiteáin faoi úsáid na tine an samhradh seo

Tá achomharc déanta ag an tSeirbhís Páirceanna Náisiúnta agus Fiadhúlra (NPWS) ag an Roinn Tithíochta, Rialtais Áitiúil agus Tithíochta ar an bpobal gan tinte ná beárbaiciú a lasadh in áiteanna poiblí an samhradh seo.

Agus iad ag achainí ar an bpobal cúram agus freagracht athnuaite a fheidhmiú agus iad amuigh faoin aer, mhéadaigh an tSeirbhís Páirceanna Náisiúnta agus Fiadhúlra líon na bhfoirne talún atá ar patról dóiteáin agus tá méadú tagtha ar mhonatóireacht aeir le héileacaptair agus drones.

Dúirt an tAire Tithíochta, Rialtais Áitiúil agus Oidhreachta Darragh O’Brien TD: "Má thugann tú tine faoi deara, cuir glaoch ar na seirbhísí éigeandála ar 112 láithreach.

"Tá foirne na Seirbhíse Páirceanna Náisiúnta agus Fiadhúlra ag cur lena gcuid patróil chun teagmhais dhóiteáin fhéideartha a aithint agus gníomhú go tapa i gcás ina dtarlaíonn sé.

"Mar is eol dúinn, áfach, is fearr cosc ná leigheas, agus táimid ag iarraidh ar gach ball den phobal tinte a lasadh i limistéir oscailte a sheachaint."

Dúirt an tAire Stáit um Oidhreacht agus Athchóiriú Toghcháin Malcolm Noonan TD a thuilleadh: "Is áiteanna iad ár bPáirceanna Náisiúnta agus ár dTearmainn Dúlra, dumhcha cois cósta, sléibhte agus ardtailte, coillte, móinéir agus páirceanna uirbeacha ar fad a mbainimid taitneamh as am a chaitheamh sa dúlra, ach is áit iad freisin dár bhfiadhúlra luachmhar agus dá n-óg leochaileach."

D’iarr Ard-Stiúrthóir an NPWS, Niall O Donnchú, chomh maith ar chomhoibriú gach duine chun an dúlra a chosaint agus dúirt: "Iarraimid ar bhaill den phobal gan tinte nó beárbaiciú a lasadh in aon Pháirc Náisiúnta nó Tearmann Dúlra, nó go deimhin sa dúlra go ginearálta.

Táimid ag iarraidh freisin ar an bpobal a bheith airdeallach agus aon ghníomhaíocht dóiteáin a thuairisciú gan mhoill."