Athnuaíonn na Gardaí achainí ar chomóradh 40 bliain ó imigh Philip Cairns ar iarraidh
D’imigh Philip Cairns ar iarraidh agus é ag siúl óna theach go dtí a scoil i Ráth Fearnáis, Baile Átha Cliath, ar an 23 Deireadh Fómhair, 1986
Tá achainí athnuaite ar fhaisnéis eisithe ag na Gardaí atá ag fiosrú imeacht Philip Cairns i mBaile Átha Cliath ceithre scór bliain ó shin.
In ainneoin go bhfuil fiosrúchán gníomhach ar siúl ag na Gardaí chun a fháil amach cá bhfuil sé, níor aimsíodh riamh é.
D’fhág Philip, a bhí 13 bliana d’aois, a scoil nua, Coláiste Éanna, ar a 12:50 i.n. agus shiúil sé an t-achar gairid abhaile go Bóthar Bhaile Uí Ruáin, i Ráth Fearnáis. Ar a 1:30 i.n., thóg sé a mhála scoile agus d’fhág sé an teach chun filleadh ar an scoil. Sin an uair dheireanach a chonaic a theaghlach Philip riamh; níor shroich sé an scoil ar ais an lá sin.
Sé lá tar éis do Philip imeacht ar iarraidh, thángthas ar a mhála scoile i lána in aice na scoile. Nascann an lána seo Bóthar Ann Devlin agus Céide Ann Devlin. Bhí cuid de leabhair Philip ar iarraidh ón mála.
De réir na nGardaí, bhí Philip 5 throigh 2 orlach ar airde agus gruaig dhubh ghearr air. Nuair a chonaic daoine é go deireanach, bhí éide scoile Choláiste Éanna á caitheamh aige: seaicéad liath le coirnéil dhubha ar na guaillí, bríste scoile liath, léine liath agus geansaí scoile.
Ar an gcomóradh seo — 40 bliain ó imigh sé ar iarraidh — tá na Gardaí ag athnuachan a n-achainí ar an bpobal chun faisnéis a sholáthar.
"Le ceithre scór bliain anuas ó imigh Philip ar iarraidh, tá níos mó ná 1,600 líne fiosrúcháin leanúna déanta ag na Gardaí. "Tá teagmháil agus eolas á bhfáil ag foireann imscrúdaithe an Gharda Síochána ón bpobal go rialta," a dúirt urlabhraí, a chuir leis go bhfuil an fhoireann imscrúdaithe i dteagmháil leanúnach le teaghlach Cairns.
Tá aird shuntasach ón meáin tar éis díriú ar imeacht Phillip le seachtainí agus míonna beaga anuas; rud a chuir an scéal ar ais i lár an phlé phoiblí agus a thug chun solais píosaí nua eolais.
"Ar nós an eolais ar fad a fuarthas roimhe seo, tá an t-eolas is déanaí seo – a tugadh d’fhoireann imscrúdaithe an Gharda Síochána – á scrúdú agus á mheasúnú, féachaint an bhfuil aon luach fianaise ag baint leis."
Iarrann an Garda Síochána ar aon duine a bhfuil eolas aige faoi imeacht Philip Cairns – is cuma cé chomh neamhthábhachtach is a d’fhéadfadh an t-eolas sin a bheith – gan glacadh leis go bhfuil an t-eolas sin ag an nGarda Síochána cheana féin, nó nach bhfuil sé ábhartha. "Déan teagmháil le foireann imscrúdaithe an Gharda Síochána, le do thoil," a dúirt an t-urlabhraí.
Tá fonn orthu labhairt le daoine atá:
• in ann labhairt le foireann imscrúdaithe an Gharda Síochána anois mar gheall ar an aird a bhí ag na meáin air le déanaí;
• ag a bhfuil eolas faoi imeacht Philip nó faoina mhála scoile, ach nár tháinig chun cinn ar chúis ar bith;
• a bhí óg tráth imeachta Philip agus nach raibh siad in ann eolas a thabhairt don Gharda Síochána ag an am, ach a d’fhéadfadh é sin a dhéanamh anois.
De réir mar a théann an t-am thart agus de réir mar a athraíonn cúinsí, b’fhéidir go mbeidh na daoine seo in ann teacht chun cinn anois chun cabhrú leis an nGarda Síochána agus freagraí a thabhairt do theaghlach Philip.
Deir an Garda Síochána go dteastaíonn uathu a chinntiú d’aon duine a thagann chun cinn go gcaithfidh na Gardaí imscrúdaithe leo go híogair agus go discréideach. D’fhéadfadh fiú an píosa eolais is lú – rud a d’fhéadfadh a bheith neamhthábhachtach dar leat – cabhrú leis an imscrúdú.
Iarrtar ar aon duine a bhfuil eolas aige teagmháil a dhéanamh le stáisiún Garda Ráth Fearnáin ag 01 666 6500, le Líne Rúnda an Gharda Síochána ag 1800 666 111, nó le haon stáisiún Garda eile.