Líon na nGardaí ag leibhéal is airde riamh agus na baill is déanaí ag céimniú amach
Tar éis do 207 earcaí mionn a thógáil, ardóidh líon na nGardaí mionnaithe go dtí an leibhéal is airde riamh – 14,825.
Tá an líon is airde ball riamh ag An Garda Síochána i stair Stát na hÉireann, agus leis an gcéimniú amach is déanaí, tá an líon ag druidim le 15,000.
Tar éis do 207 earcaí mionn a thógáil, ardóidh líon na nGardaí mionnaithe go dtí an leibhéal is airde riamh – 14,825.
Is é seo an grúpa is mó a ghlac mionn ag an am céanna ó thús phaindéim Covid.
Tá an líon seo – 14,825 Garda mionnaithe – níos airde ná an líon is airde a bhí ann roimhe seo, 14,758 i mí an Mhárta 2020 (tráth a raibh freagairt á tabhairt ar phaindéim Covid-19).
Ag labhairt dó ag searmanas an Aoine, dúirt an Coimisinéir Garda Justin Kelly leis na daoine a bhí i láthair go bhfuil siad ag dul isteach in An Garda Síochána “ag tráth a bhfuil fás agus forbairt shuntasach ar siúl”.
“Tar éis imeacht an lae inniu, beidh an líon is airde Gardaí riamh ag An Garda Síochána, agus muid ag druidim anois le 15,000 Garda,” a dúirt sé.
“Is cloch mhíle thábhachtach é seo agus muid ag leanúint ar aghaidh ag neartú ár gcumas chun freastal ar phobail ar fud na hÉireann.
“Ina theannta sin, is é seo an grúpa is mó a bhain céim amach as Coláiste an Gharda ó thús phaindéim Covid-19.
“Ar ndóigh, táimid ag súil le póilíneacht ar an líne thosaigh a neartú tuilleadh agus ár gcumas chun freastal ar phobail ar fud na hÉireann a mhéadú. Agus i mbliana, táimid ag súil go mbeidh beagnach 1,000 Garda nua ag críochnú a gcuid oiliúna i gColáiste an Gharda; léiríonn sé seo an dul chun cinn leanúnach atá á dhéanamh maidir le hearcú agus oiliúint.
“Tá suim láidir fós ann i ngairm sa phóilíneacht, agus táimid ag obair chun cur leis an móiminteam sin sna blianta amach romhainn.” Tá 136 fear agus 71 bean sa ghrúpa nua-earcaithe, agus tá 24 acu as tíortha lasmuigh d’Éirinn — 15 tír san iomlán, ina measc Sasana, Esuaitíní agus an Moldóiv.
Beidh siad i mbun dualgas i stáisiúin Gharda Síochána ar fud na tíre sna seachtainí amach romhainn.
Tá 398 earcach Garda eile ag tabhairt faoin gclár oiliúna i gColáiste an Gharda Síochána faoi láthair.
Tiocfaidh an chéad ghrúpa earcaigh eile isteach i gColáiste an Gharda Síochána ar an 2 Samhain.