Gabhann na Gardaí vapes agus táirgí ina bhfuil cannabas, ar fiú €3 mhilliún iad
Cuirfear na táirgí a urghabhadh chuig Forensic Science Ireland lena n-anailísiú.
Tá imscrúduithe ar siúl tar éis urghabháil a dhéanamh ar ghléasanna gaile (vapes) mídhleathacha agus ar tháirgí cannabais, ar fiú níos mó ná €3 mhilliún iad.
Mar chuid d’oibríocht leanúnach atá dírithe ar Ghrúpa Coireachta Eagraithe a bhíonn i mbun díol agus soláthar gléasanna gaile mídhleathacha agus táirgí cannabais ar fud na tíre, rinne baill de Bhiúró Náisiúnta na nGardaí um Dhrugaí agus Coireacht Eagraithe cuardach ar áiteanna i Longfort, i Maigh Eo, i Ros Comáin, i Loch Garman agus i gCeatharlach Dé Céadaoin, an 14 Deireadh Fómhair 2026.
"Bhí níos mó ná 100 Garda, ón mBiúró Náisiúnta um Dhrugaí agus Coireacht Eagraithe (GNDOCB), ó aonaid speisialaithe náisiúnta agus ó aonaid eile sna contaetha sin, páirteach sna cuardaigh," a dúirt urlabhraí ón nGarda Síochána.
"Urghabhadh gléasanna gaile mídhleathacha agus táirgí cannabais a bhfuil luach sráide measta acu de bhreis agus €3 mhilliún san iomlán, chomh maith le breis agus €235,000 in airgead tirim, £3,000 steirling, $3,500 dollar SAM agus roinnt feithiclí ardluacha," a dúirt an t-urlabhraí.
Cuirfear na táirgí a urghabhadh chuig Forensic Science Ireland (FSI) lena n-anailísiú.
Níl aon duine gafa faoi láthair agus deir na Gardaí go bhfuil imscrúduithe ar siúl.