Athachomharc ar son eolais maidir le dúnmharú Paul Quinn
Buaileadh an duine 21 bliain d'aois chun báis i scioból feirme i gContae Mhuineacháin 19 bliain ó shin
Tá achainí athnuaite ar fhaisnéis seolta ag na Gardaí atá i mbun imscrúdaithe ar bhás fir 21 bliain d’aois i gContae Mhuineacháin, fear a bhí buailte chun báis.
Maraíodh Paul Quinn 19 bliain ó shin, Dé Máirt seo caite.
Creideann a theaghlach, atá ag leanúint ar aghaidh le feachtas ar son an cheartais, gurbh iad baill den IRA a bhí freagrach as an marú; áfach, tá sé séanta le fada ag Sinn Féin go raibh baint ag poblachtánaigh leis an eachtra.
Go dtí seo, tá 23 duine curtha faoi ghabháil i dtaca leis an dúnmharú – ach níor cúisíodh aon duine riamh.
Tá achainí déanta ag na Gardaí ar aon duine a bhfuil eolas acu a chabhródh leo na marfóirí a thabhairt os comhair an dlí teacht chun cinn.
I ráiteas, dúirt urlabhraí ón nGarda Síochána gur ionsaigh drong d’fhir chumhdaithe – idir ochtar agus deichniúr acu – an tUasal Quinn agus cara leis.
Creidtear gur thaistil siad i gcarr, thart ar a 6 a chlog tráthnóna ar an 20 Deireadh Fómhair 2007, chuig foirgnimh sheachtracha agus seidanna i Tullyvanus, Castleblayney, Contae Mhuineacháin.
Nuair a shroich siad an áit, d’ionsaigh drong d’fhir chumhdaithe iad; bhí airm ag cuid acu.
De réir na nGardaí, cheangail an drong an tUasal Quinn agus a chara, agus ansin rinneadh ionsaí foréigneach leanúnach ar an Uasal Quinn.
Dúirt siad go gcreidtear gur theith na hionsaitheoirí ón láthair i veain bhán. Níor aimsíodh an fheithicil sin riamh le linn an imscrúdaithe, inar gabhadh 23 duine go dtí seo.
“Tá na Gardaí fós ag lorg aon eolais a d’fhéadfadh cabhrú leis an bhfeithicil a aithint agus a aimsiú,” a dúirt siad.
As an 23 duine a gabhadh, gabhadh 14 acu i bPoblacht na hÉireann agus naonúr i dTuaisceart Éireann. Is imscrúdú é seo ina bhfuil dlúthchomhoibriú ar siúl idir an Garda Síochána agus Seirbhís Póilíneachta Thuaisceart Éireann.
Sheol an Ceannfort Bleachtaireachta Ronan Carey achainí chuig muintir cheantar Cullyhanna i nDeisceart Ard Mhacha, á iarraidh orthu teacht chun cinn má tá aon eolas acu.
“Inniu táim ag athnuachan m’achainí oraibh, an pobal áitiúil, mar tá an t-eolas agaibh atá ag teastáil uainn chun dul chun cinn a dhéanamh leis an imscrúdú seo. Táim ag achainí go háirithe ar mhuintir cheantar Cullyhanna i nDeisceart Ard Mhacha,” a dúirt sé. “Táim ag achainí ar na fir sin a bhí sa seid, chomh maith le cairde nó baill teaghlaigh na bhfear seo, a bhfuil a fhios acu cad a tharla ar an 20 Deireadh Fómhair 2007, agus a d’iompair an t-ualach sin ina gcoinsias ó shin i leith – an t-eolas faoi cad a tharla do Paul.
“Tá am imithe thart anois agus b’fhéidir go bhfuil athrú tagtha ar an gcaidreamh a bhí ann. Iarraim ar aon duine a raibh eagla air labhairt linn le 19 bliain anuas teacht chun cinn anois. B’fhéidir go raibh cúis leis an eagla a bhí oraibh, ach anois an t-am chun teacht chun cinn agus an t-eolas atá agaibh a roinnt linn, faoi rún.
“Iarraim oraibh teagmháil a dhéanamh leis na Gardaí nó leis an PSNI trí cheann ar bith de na huimhreacha gutháin seo a leanas, nó trí na línte gutháin rúnda, ar bhealach gan ainm. Cabhraigí linn chun suaimhneas a thabhairt do thuismitheoirí Paul, Breege agus Stephen Quinn, atá fós ag fulaingt go mór de bharr an chaillteanais uafásaigh a bhain dá mac, Paul.”
Má tá eolas ar bith agat, is féidir teagmháil a dhéanamh le Stáisiún Gardaí Chaisleán an Bhlaonaigh ar 042 974 7900, le Líne Rúnda na nGardaí ar 1800 666 111, nó le Crimestoppers (Tuaisceart Éireann) ar 0800 555 111.