Tá rabhadh faoi cheo tiubh eisithe ag Met Éireann do 25 contae
Beidh an rabhadh ‘Stádas Buí’ i bhfeidhm ó 9 i.n. Dé Sathairn go dtí 11 r.n. Dé Domhnaigh
Táthar ag iarraidh ar úsáideoirí bóithre a bheith cúramach agus iad ag tiomáint oíche Dé Sathairn, tar éis do Met Éireann rabhadh faoi cheo a eisiúint don chuid is mó den tír.
Beidh an rabhadh ‘Stádas Buí’ – a bhaineann le 25 contae – i bhfeidhm ó 9 i.n. go dtí 11 r.n. Dé Domhnaigh.
Deir Met Éireann go mbeidh ceo tiubh ag teacht aníos i rith na hoíche, rud a d’fhéadfadh droch-infheictheacht agus coinníollacha deacra taistil a chruthú.
Baineann an rabhadh le gach contae in Éirinn, seachas Dún na nGall.
Tá deireadh tagtha anois le rabhadh ar leith ‘Stádas Buí’ faoi cheo a bhí i bhfeidhm do chúige Laighean, cúige Mumhan agus Gaillimh.
Ina réamhaisnéis is déanaí, deir Met Éireann go scaipfidh an ceo de réir a chéile i rith mhaidin an Domhnaigh, cé go bhfanfaidh sé i roinnt áiteanna go dtí an tráthnóna.
Beidh an Domhnach tirim don chuid is mó, le tréimhsí níos gile ag teacht chun cinn de réir mar a imíonn an ceo, agus ní bheidh ach cúpla cith báistí le feiceáil in aice leis an gcósta.
Beidh an Domhnach fuar arís, agus teochtaí ag dul ó 7 go 11 céim ar a mhéad. Beidh gaotha éadroma athraitheacha ann, a thiocfaidh den chuid is mó ón oirthear agus a neartóidh beagán san iardheisceart de réir mar a théann an lá ar aghaidh.