IS DÉANAÍ | Deimhníonn RTÉ ceapachán Príomhoifigeach Airgeadais nua

D’fhógair RTÉ ceapachán Annemarie Britz mar Phríomhoifigeach Airgeadais, RTÉ i ndiaidh comórtas poiblí.

Faoi láthair, is í Stiúrthóir Airgeadais agus Feidhmíochta Gnó i mBanc Ceannais na hÉireann í, agus tosóidh sí sa ról i bhfómhar na bliana 2026.

Tháinig Annemarie isteach i mBanc Ceannais na hÉireann in 2019 mar Cheann na Roinne Rialaithe Airgeadais, post a bhí aici go dtí 2024 nuair a ceapadh í ina ról reatha.

Sula ndeachaigh sí isteach sa Bhanc Ceannais, chaith Annemarie formhór a gairme ag obair san earnáil phríobháideach san Afraic Theas áit a raibh roinnt post mar POF aici.

LÉIGH FREISIN | 'Ba sheoid í' - Ómós don amhránaí tíre Ceilteach Moya Brennan

Tháinig sí isteach i mBanc Cúltaca na hAfraice Theas in 2014 áit a raibh poist Leas-Phríomhoifigeach Airgeadais (2014 – 2016) agus Leas-Cheann Margaí Airgeadais (2016 – 2019) aici.

Is ionadaí í Annemarie ar Bhanc Ceannais na hÉireann ar Choiste Buiséid an Bhainc Cheannais Eorpaigh agus is ball í dá líonra domhanda POFanna Banc Ceannais.

Bhí sí ina ball de Choiste Cuntasaíochta agus Ioncaim Airgeadaíochta an BCE roimhe seo.

Tá céim Onóracha BCom i gCuntasaíocht ag Annemarie agus Teastas i dTeoiric na Cuntasaíochta ó Ollscoil Pretoria, san Afraic Theas, agus is Cuntasóir Cairte cáilithe í.

LÉIGH FREISIN |  Tuairisc nua faighte amach go raibh Ryanair i measc na gcomhlachtaí ba mhó a ndearnadh gearán fúthu in Éirinn anuraidh

Ag trácht ar cheapadh Annemarie Britz, dúirt Príomh-Stiúrthóir RTÉ, Kevin Bakhurst: “Táim an-sásta leis an bhfógra faoi cheapadh Annemarie Britz mar chéad Phríomhoifigeach Airgeadais RTÉ tar éis próiseas roghnúcháin dian.

“Tugann Annemarie taithí mhór don ról a bheidh ina buntáiste mór domsa agus d’Fhoireann Cheannaireachta RTÉ agus muid ag leanúint leis an gclaochlú riachtanach ar RTÉ agus ag cinntiú go bhfanfaidh an eagraíocht ar chonair inbhuanaithe ó thaobh airgeadais de. Táim ag tnúth le fáilte a chur roimpi chuig an eagraíocht go luath.”

Ag trácht ar a ceapachán, dúirt Annemarie Britz: “Is pribhléid é dul isteach in RTÉ ag tráth chomh ríthábhachtach sin. Creidim go mór i misean RTÉ freastal ar an bpobal agus léiriú a dhéanamh ar shaol na hÉireann ar fad — agus táim ag tnúth le mo ról a ghlacadh in eagraíocht ina bhfuil an oiread sin daoine atá tiomanta don mhisean sin a chomhlíonadh gach aon lá.”

Fógrófar socrú eatramhach roimh imeacht an Phríomhoifigigh Airgeadais reatha, Mari Hurley.