Buíochas leis an gcomhairle as graifítí maslacha a bhaint de thrá in Éirinn

Tá comhairleoir áitiúil tar éis buíochas a ghabháil le Comhairle Contae Dhún na nGall as an ngníomh tapa a rinne siad chun graifítí maslacha a bhaint de thrá i dtuaisceart an chontae.

Ag cruinniú de Cheantar Bardasach Leitir Ceanainn-Bhaile na nGallóglach, ghabh an Comhairleoir Liam Blaney (Fianna Fáil) buíochas leis an údarás áitiúil as an obair phráinneach a rinne siad chun an ghraifítí a bhaint de bhloc leithris ag Trá Warden i bPort Salainn.

Tuairiscíonn Donegal Live go ndearnadh iarracht an ghraifítí – ina raibh ráitis Ioslamafóbacha – a bhaint le meaisín níocháin ardbhrú, ach go raibh an phéint a úsáideadh ar chaighdeán chomh hard sin nach raibh sé éasca í a bhaint.

Tá an Comhairleoir Blaney ag iarraidh anois go gcuirfí maoiniú ar fáil chun an bloc leithris ar fad a athphéinteáil.

“Tá péint curtha thar an scríbhneoireacht féin. Is é an t-aon rud atá á iarraidh agam anois ná go bhfaighfimid buiséad chun na leithris a athphéinteáil,” a dúirt sé.

Dúirt an Comhairleoir Blaney freisin nach n-aontaíonn sé leis an gcaoi a bhfuil pictiúir den ghraifítí á scaipeadh ar na meáin shóisialta; tá imní air go mbraithfidh an té a rinne an gníomh “go maith fúthu féin” dá bharr.

Chuir an Comhairleoir Declan Meehan (Neamhspleách) síos ar an eachtra mar “ghníomh loitiméireachta uafásach gan chiall”.

D’iarr an Comhairleoir Meehan freisin ar aon duine a bhfuil eolas acu faoi na daoine atá freagrach teagmháil a dhéanamh leis an nGarda Síochána.