Fáiltíonn an tAire Calleary roimh cheadú mhaoinithe 2025 d'Fhoras na Gaeilge agus do Ghníomhaireacht na hUltaise

Bhí an tAire Forbartha Tuaithe agus Pobail agus Gaeltachta, Dara Calleary TD, ina chathaoirleach ar an naoú cruinniú is fiche d’Fhoras Teanga na Comhairle Aireachta Thuaidh Theas (CATT). 

D'fhreastail an tAire Pobail, Gordon Lyons CTR, agus an tAire Sóisearach ag Oifig an Fheidhmiúcháin, Aisling Reilly CTR ar an gcruinniú in Ard Mhacha, mar aon le hionadaithe ón dá ghníomhaireacht de chuid an Fhorais Teanga Thuaidh Theas, Foras na Gaeilge agus Gníomhaireacht na hUltaise.

Cheadaigh an cruinniú CATT na Pleananna Gnó 2025, rud a cheadaíonn an maoiniú comhaontaithe do 2025 a chur ar fáil d'Fhoras na Gaeilge agus do Ghníomhaireacht na hUltaise. Cuirfidh na leibhéil aontaithe maoinithe ar chumas Fhoras na Gaeilge na ciorruithe a d'fhógair sé níos luaithe i mbliana a aisiompú, agus ag an am céanna tacú le clár pobail Ghníomhaireacht na hUltaise.

LÉIGH FREISIN: 'Iontach!' Bronnann lucht féachana Late Late Toy Show suim iontach airgid ar Achomharc an tSeó Toy

Tugadh faoi deara freisin go bhfuil tús curtha leis an bplé maidir leis an gcéad tréimhse pleanála eile do 2026-2028 agus go mbeidh athbhreithniú ar raon cúrsaí rialachais agus nósanna imeachta laistigh de na gníomhaireachtaí, lena n-áirítear an chaoi a dhéantar déileáil le costais phinsin.

Ag labhairt dó i ndiaidh an chruinnithe, dúirt an tAire Calleary: "I measc na n-ábhar a phléamar ar maidin bhí staid mhaoinithe Fhoras na Gaeilge agus Ghníomhaireacht na hUltaise araon. Tá mo Roinn anois in ann íocaíocht bhreise aonuaire ar luach €630,000 a dhéanamh le Foras na Gaeilge do 2025, a bhaineann le costais stairiúla phinsin, agus cuirfidh sé sin ar chumas Fhoras na Gaeilge na ciorruithe a d'fhógair sé níos luaithe i mbliana a aisiompú.

“Ba mhaith liom buíochas a ghabháil leis an Aire Lyons agus lena Roinn as a gcomhoibriú san ábhar seo, faoina mbeidh muid ag cur airgead breise aonuaire ar fáil do Ghníomhairacht na hUltaise chomh maith do 2025. Cuirim fáilte freisin roimh an rún go ndéanfar plé idir na Ranna agus na gníomhaireachtaí ar raon ábhar, lena n-áirítear rialachas agus déileáil le costais phinsin don chéad tréimhse maoinithe eile." 

Cheadaigh cruinniú na Comhairle inniu freisin chomhaltaí boird a cheapadh ar ghníomhaireachtaí an Fhorais Teanga Thuaidh Theas, lena n-áirítear deichniúr ball arna n-ainmniú ag Rialtas na hÉireann, ina mbeidh seisear ball ar bhord Fhoras na Gaeilge agus ceathrar ar Ghníomhaireacht na hUltaise. 

Ag labhairt dó faoi na ceapacháin seo inniu, chuir an tAire Dara Calleary fáilte roimh a gceapachán: "Táim an-sásta leis an raon scileanna agus taithí a thugann na comhaltaí seo chuig an bhForas Teanga Thuaidh Theas, agus táim ag tnúth le rannchuidiú cuiditheach a dhéanamh le hobair na ngníomhaireachtaí seo sna blianta amach romhainn". 

Táthar ag súil go mbeidh an chéad chruinniú eile den Fhoras Teanga Thuaidh Theas ar siúl i bhfómhar 2025.