Colún le Caoimhghín: Céard é an tOireachtas?

Níl sé ach tamall ó bhí Oireachtas na Samhna faoi lánseol thíos i gCill Áirne, Ciarraí. “Nollaig na nGael”, a thugtar go minic air, seachtain de chomórtais, de chóisireacht agus d’imeachtaí de chuile shórt a dtarraingíonns os cionn 10,000 duine ann chuile bhliain.

Is deacair a thuiscint, mar sin, cén chaoi nach bhfuil a fhios ag formhór mhuintir na Galltachta (An Ghalltacht: Éire an Bhéarla), ná ag an-chuid de lucht foghlamtha na Gaeilge fiú air.

Mar fhoghlaimeoir na Gaeilge mé féin, bhí ionadh dochreidte orm an chéad uair a d’fhreastail mé ar an Oireachtas. Cuireadh in iúl é mar “Fhéile na Gaeilge” domsa a théann ó áit go háit chuile bhliain, agus leis an bhfírinne a rá, bhí sé de dhrogall ormsa dhul ó dheas aige ar leibhéal áirid, os rud é gur shíl mé gur ócáid bheag, dhúnta a bheadh i gceist leis.

Thuigfeá dhom, mar sin, an t-iontas a d’fhág gan fhocail mé nuair a chonacthas dhom na sluaite móra millteacha; meascán de gach grúpa aois, gach cineál gnéis, agus ní hamháin muintir na Gaeltachta, ach Saol na Gaeilge uilig; cainteoirí ó chuile áit sa tír, Duibhlinnigh agus Feirstigh ina measc, agus ó áiteacha chomh faide thiar i gcéin le hOileán an Turtair (ainm de bhunadh bundúchasach do Mheiriceá Thuaidh), an Afraic Theas agus an tSeapáin.

Ach mar sin féin, cuirtear i gcuimhne dhom an cartún de chuid an ealaíontóra Ciara Kenny (a bhfeidhmíonn sí faoin lorgán @ciaraioch ar na meáin sóisialta) faoin Oireachtas. Léirigh an cartún, idir eile, an damhnsa, an amhránaíocht, an chóisireacht agus an chraic a bhaineanns leis, ach chríochnaigh leis an líne: “Eh... Chaithfeá a bheith ann...”

I gCill Áirne arís a bheidh an tOireachtas ar siúl an bhliain seo chugainn.